ແນວພັນຫ້ວຍໂຄດ 1 (HK1) ແມ່ນແນວພັນທີ່ໄດ້ປະສົມຈາກສູນຄົ້ນຄວ້າເຂົ້ານາພອກລະຫວ່າງແນວພັນເຂົ້າເມືອງງາ(ຕົ້ນແມ່) ກັບແນວພັນ TDK 7 (ຕົ້ນພໍ່). ໃຊ້ຮູບແບບປະສົມພັນແບບດ່ຽວໃນລະດູແລ້ງ 2007-2008, ປູກຄັດເລືອດທີ່ສູນ ຮອດຊົ່ວໂມງທີ່ 4 ແລ້ວ ສົ່ງໄປຄັດເລືອກທີ່ສູນຄົ້ນຄວ້າກະສິກຳເຂດເນີນສູງ ບ້ານຫ້ວຍໂຄດ ເມືອງຊຽງເງີນ ແຂວງຫຼວງພະບາງ. ຄັດເລືອກຕໍ່ໃນຊົ່ວໂມງທີ່ 5 ແລະ 8 ໃນລະດູແລ້ງ 2016-2017 ແມ່ນທ່ານແຄມ ບ້ານຊຽງເງີນປູກຂະຫຍາຍ, ທົດສອບການກິນດີ ແລະ ປູກຂະຫຍາຍເມັດພັນ, ແລກປ່ຽນ, ແຈກຢາຍໃນບ້ານ ແລະ ບ້ານອື່ນໆ ມາເຖິງປະຈຸບັນຂະຫຍາຍໄປຫຼາຍບ້ານເຊັ່ນ: ບ້ານຊຽງເງີນ, ບ້ານນາຄ່າ, ບ້ານຫ້ວຍໂຄດ, ບ້ານໂພນໄຊ, ບ້ານຖິ່ນແກ້ວ ເມືອງຊຽງເງີນ. ບ້ານນະຄອນ ເມືອງນໍ້າບາກ, ບ້ານຄົກປາ ເມືອງຫຼວງພະບາງ, ບ້ານສົບຄານ, ບ້ານເມືອງງອຍເກົ່າ ເມືອງງອຍແຂວງຫຼວງພະບາງ(ການແຜ່ກະຈາຍໃນຮອບທີ່ 1) . ຈາກນັ້ນ ໃນລະດູຝົນປີ 2020 ຈຶ່ງໄດ້ນຳເອົາແນວພັນດັ່ງກ່າວໄປປູກສາທິດຄືນ ບ້ານນາຄ່າ ເມືອງຊຽງເງີນ ແຂວງຫຼວງພະບາງ. ຈາກການເຊີນຊາວນາຢູ່ອ້ອມຂ້າງມາຮ່ວມປະເມີນຜະລິດດີ ແລະ ການກິນກໍ່ແຊບ, ຈາກນັ້ນຈຶ່ງປູກຂະຫຍາຍໃນພື້ນທີ່ກວ້າງຂອງຕົນເອງໃນລະດູຝົນ 2021 ແລະ ແຈກຍາຍໃຫ້ຊາວນາອ້ອມຂ້າງຈຳນວນໜຶ່ງ. ຈາກຜົນໄດ້ຮັບໃນລະດູຝົນກໍ່ຍິ່ງມີຊາວນາຈຳນວນຫຼາຍມາຈັບຈອງ, ແລກປ່ຽນ ແລະ ຂໍຊື້ໄປເຮັດແນວປູກໃນລດູນາແຊງ 2022 ເປັນຈຳນວນ 600 ກິໂລສາມາດປູກໄດ້ໃນເນື້ອທີ່ 15 ເຮັກຕາ. ຈາກນັ້ນກໍ່ຂະຫຍາຍອອກສູ່ວົງກວ້າງໄປຕ່າງແຂວງຄື: ໄຊຍະບູລີ, ແຂວງວຽງຈັນ, ແຂວງອຸດົມໄຊ ແລະ ແຂວງຫຼວງນໍ້າທາ ເປັນຈຳນວນເມັດພັນ 1,200 ກິໂລ ສາມາດປູກໄດ້ໃນເນື້ອທີ່ 30 ເຮັກຕາ ພາຍໃນ 2 ປີ ຫຼື 4 ລະດູການຜະລິດເຂົ້ານາ(ການແພ່ກະຈ່າຍໃນຮອບທີ່ 2) ເຫັນວ່າຜົນຜະລິດ ຕັ້ງແຕ່ 4-6 ໂຕນ/ເຮັກຕາ.
I. ລັກສະນະເດັ່ນຂອງແນວພັນເຂົ້າຫ້ວຍໂຄດ 1
1. ເໝາະກັບດິນນາຮ່ອມພູ
2. ປັບຕົວກັບສະພາບແວດລ້ອມໄດ້ດີ
3. ທົນບົ່ວໄດ້ດີ
4. ຜົນຜະລິດດີ 4-6 ໂຕນ/ເຮັກຕາ
ຕາຕະລາງປຽບທຽບລັກສະນະ ແນວພັນຫວ້ຍໂຄດ 1 ກັບພໍ່ແມ່ພັນ
ຕາຕະລາງປຽບທຽບລັກສະນະ ແນວພັນຫວ້ຍໂຄດ 1 ກັບພໍ່ແມ່ພັນ
| ແນວພັນເຂົ້າ | ຫວ້ຍໂຄດ 1 | ເມືອງງາ | TDK 7 |
| ປະເພດເຂົ້າ | ເຂົ້າໜຽວ | ເຂົ້າໜຽວ | ເຂົ້າໜຽວ |
| ສີເມັດ | ສີເຟືອງກົ້ນຈູດ | ສີເຟືອງແຊດດຳ | ສີເຟືອງ |
| ອາຍຸ(ວັນ) | 130-135 | 145-150 | 130-135 |
| ລະດູປູກ | ປູກໄດ້ 2 ລະດູ | ປູກໄດ້ລະດູຝົນ | ປູກໄດ້ 2 ລະດູ |
| ລວງສູງ(ຊມ) | 90-100 | 120-130 | 90-100 |
| ເປີເຊັນການສີ(%) | >68 | 65.7 | 60 |
| ຜົນຜະລິດ(ໂຕນ/ເຮັກຕາ) | 4-6 | 3-5 | 4-6 |
| ການທົນທານຕໍ່ແມງບົ່ວ | ທົນທານ | ທົນທານ | ບໍ່ທົນທານ |
II. ແນະນຳການປູກ
ແນວພັນຫວ້ຍໂຄດ 1 ສາມາດປູກໄດ້ 2 ລະດູດຄື: ນາແຊງ ແລະ ນາປີ
1. ວິທີການປູກ
– ນາດຳແມ່ນແນະນຳຕົກກ້າຊ່ວງເດືອນ ມິຖຸນາ(ນາປີ) ແລະ ທ້າຍເດືອນທັນວາຫາຕົ້ນເດືອນມັງກອນ(ນາແຊງ), ຕົ້ນກ້າໄດ້ 20-25 ວັນສາມາດນຳໄປປັກດຳໄດ້
– ສາມາດດຳໃນອັດຕາ 2-3 ກີບ/ສຸ່ມ
2. ການໃສ່ຝຸ່ນ
– ໃສ່ຮອງພື້ນ: ໃສກ່ອນປັບດຳ ຫຼື ຫຼັງປັກດຳໄດ້ 5-7 ມື້ ແມ່ນໃຫ້ໃສ່ຝຸ່ນປະສົມສູດ 15-15-15 ຫຼື ຝຸ່ນປະສົມສູດ 16-20-00 ໃນອັດຕາ 200 ກິໂລ/ເຮັກຕາ.
– ໃສ່ເລັ່ງ: ຄວນໃໃສ່ຝຸ່ນເລັ່ງ 2 ຄັ້ງ: ສູດ 46-00-00 ຫຼັງຈາກປັກດຳໄດ້ 20 ມື້ ແລະ 45 ມື້ ໃນອັດຕາ 30 ກິໂລ/ເຮັກຕາ
3. ການເກັບກ່ຽວ:
ເໝາະສົມກັບການນຳໃຊ້ກົນຈັກເກັບກ້ຽວເພາະເປັນຕົ້ນເຂົ້າໃຫ່ຍ ແລະ ແຂງ, ສາມາດເກັບກ່ຽວໄດ້ພາຍໃນ 30 ວັນ ພາຍຫຼັງເຂົ້າອອກດອກໄດ້ 50% , ບໍ່ຄວນກ່ຽວຊ້າກວ່ານີ້ເພາະຈະເຮັດໃຫ້ເຂົ້າຫັກໃນເວລານຳໄປສີຈະເຮັດໃຫ້ເປີເຊັນເຂົ້າສານປະເພດ 1 ຕໍ່າ, ຖ້າໃຊ້ແຮງງານຄົນເກັບກ່ຽວຄວນຕາກຝ່ອນເຂົ້າໃນທົ່ງນາປະມານ 2 ແດດ ຈຶ່ງເກັບກູ້ ແລະ ຟາດຕີ.
ແຫຼາງຂໍ້ມູນ: file:///C:/Users/HP/Downloads/7MlQo9o2jtMIzK8Q.pdf
ຕິດຕໍ່ປະສານແນວພັນເຂົ້າ: ປອ ຄຳດອກ ຊົງຢີຄັ້ງຊືທໍ່, ສູນຄົ້ນຄວ້າກະສິກຳເຂດເນີນສູງ
ໂທ: 020 55 673 953