ກ່ຽວກັບ LAO-AMIS

LAO-AMIS ເປັນລະບົບເກັບກໍາຂໍ້ມູນຂ່າວສານກ່ຽວກັບສິນຄ້າກະສິກໍາ (ໃນເບື້ອງຕົ້ນ ແມ່ນສິນຄ້າເຂົ້າ) ຢູ່ ສປປ ລາວ, ເປັນຂໍ້ມູນພື້ນຖານທີ່ນໍາໃຊ້ເຂົ້າໃນການວິເຄາະ ແລະ ຄາດຄະເນຕະຫຼາດສິນຄ້າກະສິກໍາຢູ່ພາຍໃນປະເທດ ແລະ ສາກົນ; ສະໜອງຂໍ້ມູນທາງດ້ານການຕະຫຼາດກ່ຽວກັບສິນຄ້າກະສິກໍາ (ລາຄາ, ປະລິມານ, ແນວໂນ້ມ) ແລະ ຂໍ້ມູນອື່ນໆທີ່ກ່ຽວຂ້ອງ ໃຫ້ຊາວກະສິກອນ, ກຸ່ມຜູ້ຜະລິດ, ກຸ່ມຜູ້ປະກອບການໂຮງສີ, ໂຮງງານປຸງແຕ່ງ ແລະ ທຸກໆພາກສ່ວນທີ່ກ່ຽວຂ້ອງກັບຕ່ອງໂສ້ສິນຄ້າກະສິກໍາ, ແລະ ເປັນຂໍ້ມູນທີ່ນໍາໃຊ້ເຂົ້າໃນການວິເຄາະ ແລະ ການປະເມີນ ໃນການປັບປຸງນະໂຍບາຍລັດ ທາງດ້ານການສົ່ງເສີມການຜະລິດກະສິກໍາເປັນສິນຄ້າ ໃຫ້ຖືກຕ້ອງແທດເໝາະກັບສະພາບຄວາມເປັນຈິງ.

ລະບົບຂໍ້ມູນຂ່າວສານຕະຫຼາດກະສິກໍາ ຢູ່ ສປປ ລາວ (LAO-AMIS) ເປັນອົງປະກອບຍ່ອຍໜຶ່ງຂອງໂຄງການຜະລິດ ກະສິກຳເປັນສິນຄ້າຢູ່ ສປປ ລາວ (LACP) ເປັນໂຄງການທີ່ໄດ້ການຮັບສະໜັບສະໜູນ ທຶນກູ້ຢືມຈາກທະນາຄານໂລກ, ມີຈຸດປະສົງໃນການຍົກສູງຂີດຄວາມສາມາດຂອງຂະແໜງການກະສິກໍາຢູ່ ສປປ ລາວ ໃນເບື້ອງຕົ້ນໄດ້ກໍານົດເອົາ 5 ແຂວງເປົ້າໝາຍຂອງໂຄງການຄື່: ແຂວງຄຳມ່ວນ, ແຂວງບໍລິຄຳໄຊ, ແຂວງໄຊຍະບູລີ, ແຂວງວຽງຈັນ ແລະ ນະຄອນຫຼວງວຽງຈັນ; ຈັດຕັ້ງປະຕິບັດໂດຍການຮ່ວມມືຂອງ ກະຊວງກະສິກຳ ແລະ ປ່າໄມ້ ແລະ ກະຊວງອຸດສາຫະກຳ ແລະ ການຄ້າ.

ກົມສົ່ງເສີມການຄ້າ ແລະ ຫັດຖະກຳ, ກະຊວງອຸດສາຫະກຳ ແລະ ການຄ້າ ທີ່ຮັບຜິດຊອບການຈັດຕັ້ງປະຕິບັດການສົ່ງເສີມ ຊາວກະສິກອນ, ກຸ່ມຜູ້ຜະລິດ, ກຸ່ມຜູ້ປະກອບການໂຮງສີ, ໂຮງງານປຸງແຕ່ງ ແລະ ທຸກໆພາກສ່ວນທີ່ກ່ຽວຂ້ອງກັບຕ່ອງໂສ້ສິນ ຄ້າກະສິກໍາໃຫ້ເຊື່ອມໂຍງເຂົ້າຫາກັນ ແລະ ເຂົ້າເຖິງຕະຫຼາດຢ່າງມີປະສິດທິຜົນ.